作為一個年記,係時候寫篇新文章啦。

為準備撰寫2011年的回顧,我跑到年頭的xanga 看看,然後發現這個評語...

>All the best in 2011! 🙂 不過你會先寫個2011Plan待年尾再回顧嗎? XD

都係 head p 醒目,知道我呢種人未到事情完成前最後一刻都唔會的起心肝寫計劃(注意:係事情完成前的最後一刻,而不是事情發生前的最後一刻 XD)

 

好啦,點講都要補番個展望先:

 

2011Plan:

1. 一個人的旅行(已完成)
點解要一個人的旅行?因為我實在好想自助旅行,自助旅行不就是一個人的旅行嗎?(節錄自某傻呼呼的準背包客)
其實都要面對現實啦, 隨著年紀漸長,好多同齡既朋友都已經有家室,好似我呢d 「浪子」(打完自己都忍唔住笑)真係買少見少,真係唔係下下都搵到人請假陪你,重要陪你 last minute 先訂到行程機票 wor
去完番黎都預左俾d長輩話啦, 又話一個人好危險啊(其實有冇留意幾乎每單關於旅行意外的新聞報導,死得人既都係跟團),又去埋d治安咁差既地區(人地中門大開放低部腦o係街外人都入到去既 pantry 都唔驚,試問你在香港敢唔敢?唔敢既話,點解你咁勇敢在咁危險既香港住咁多年?),又話好彩你係男仔 ja(你覺得我出發前唔知自己係男仔咩?),算啦,對於一d一世仔都未試過,甚至好可能一世人都唔會一個人旅行既長輩,係唔會明白乜野係一個人旅行。
一個人旅行唔代表你由出發到回家既時間都係一個人,除非好刻意單獨行動,否則落單既時間真係少之少,因為一個人既時候實在好容易識到新朋友啦。好似我今次既旅程咁,只係得泰國機場去泰國邊境,暹粒去暹粒邊境,同埋獨闖暹粒市郊先係單飛,因為你一個人坐係度,就算你想靜下,你隔黎位都會主動跟你聊天。至於安全wor,對住一d衣衫襤褸、有色人種既陌生單身男士就真係要提防一下啦。。。係呀,果個咪係我 lor,講驚,人地重驚過你啦,你覺得世界上真係有咁多賊會打劫其他賊咩?

2. 學車(己完成)
自從三年前玩過小型賽車後,發現無論你有幾小心,你手車幾得,只要其他道路使用者亂黎,你一樣都會出「意外」。所以我真係唔想係人多車多既香港駕車啦。
但點解會走去學車?全因上年去美國啟發到我,有d地方唔會有公車到,唔到你唔駛車,亦為左準備將來可能仲會到美國開會(實情已經再冇機會啦),都係學定先穩陣d
有d人會話邊間邊間駕駛學校教得好,駕駛學院我唔講,你o係是但一個學車熱點觀察下條街,橫衝直撞起步死火既,十架有九架都係貼住駕駛學校個名。我跟過三個師傅,街師傅真係比駕駛學校教得有心機好多,特別係當你明知你俾既學費比其他學生高,仍然肯搵佢教既師傅,佢真係會有心機到為左教你,特登走去推其他學生既堂 ga~

4. 學潛水(已完成)
學潛水對小弟黎講係其中一個突破,雖然我好細個就識得游水,但亦因為我好細個就識得游水,所以我好細個就知道我好易會耳痛。但睇左好多好朋友既靚相,加上睇過一d教潛水既書,發現潛水裏的技巧對其他水上活動都有幫助,好值得去學ga,所以就約埋另外幾位都好鍾意玩水既舊同事去學啦。

5. 學山藝(已泡湯,反而意外順手學了運動攀登及攀岩)
本來我打算到總會報山藝課程,見到總會還有運動攀登及攀岩課程,所以好順手咁報埋,點知抽了三次都抽唔到,反而d運動攀登課程就俾我考晒。係香港,運動攀登都幾抵玩,康文署d室外場又靚又唔駛錢,得閒真係要玩下

Advertisements