新工返左一個月, 係時候做個 review:

1. 由數碼港到新蒲崗到觀塘,公司越黎越近屋企 :p (其實係自己放棄更遠既工作地點);

2. 數字上人工係多左, 但呢度冇十三個月糧冇左兩日假冇考試假冇返少半個鐘冇左一個鐘彈性上班時間冇機打冇一半醫保冇牙齒檢查津貼冇任食生果冇任飲咖啡汽水冇公司期權冇折讓股票,計埋通脹應該係減左人工;

3. 感覺新公司在好多地方上都幾小家,例如明明有彈性上班時間,又出晒口術話「一小時的彈性上班時間只是緩衝時間,給大家於緊急狀況下使用。」,明明可以smart casual 但又唔俾你著牛仔褲,話OT超過一個鐘會按人工比例計返錢但上限係 $25/hr (而家最低工資都去到 $28/hr 啦,咁點解唔直接寫OT錢 $25/hr 呢?),午飯時間公司會熄燈(但明明仲有人留低食飯同做野wor);Pantry 勁細,又唔比人留係位食飯,結果全世界留係公司既都要迫埋入個會議室食;明明話要環保,轉個頭走去書展送支裝水。。。

4. 成日都強調公司有最佳效益員工大獎,講到好鬼巴閉,又要工作滿一年先計,又要唔請得病假(係要人病左都要返工,傳染晒俾其他同事先安樂既),但獎品只係公司代供5%MPF @@”

(待續)

Advertisements